ඩුබායි රටේ සිටින “හයිටොප් තුෂාර” නම් ජාවාරම්කරුවාගේ මත් කුඩු අලවි කිරීමේ ජාලයේ මෙරට සිටින ගෝලයෙකුව මාරවිල පොලීසියේ දුෂණ මර්ධන ඒකකයේ නිලධාරීන් විසින් අත්අඩංගුවට ගෙන ඇත.සැකකරු සතුව තිබී හෙරෝයින් මත් කුඩු ග්‍රෑම් 21 යි මිලි ග්‍රෑම් 540 ක්ද පොලිස් බාරයට ගෙන ඇත.

ඉකුත් 22 වැනිදා නාත්තන්ඩිය - මරද ප්‍රදේශයේදී මෙම අත්අඩංගුවට ගැනීම සිදු කර ඇත.මත් කුඩු සමග පොලීසිය විසින් අත්අඩංගුවට ගෙන ඇත්තේ මාරවිල - මරද, කුරුදුවත්ත පදිංචි 29 හැවිරිදි අයෙකුවය.

“හයිටොප් තුෂාර” විසින් ලබා දෙන මත් කුඩු කුඩා පැකට් වල අසුරා ඔහු විසින් පවසන ස්ථාන වලට ගෙන ගොස් තැබීම සැකකරු විසින් සිදු කර ඇති බව පොලිස් විමර්ශණ වලදී අනාවරණය වී ඇත.මෙම මත් කුඩු අලවියේ සියළුම මුදල් ගණු - දෙණු මාර්ග ගත ක්‍රමයට සිදුවී ඇති බවත්,මෙම හේතුව නිසා අලවිකරු සහ ගැණුම්කරුවන් අතර පුද්ගලික හමුවීමක් කිසිදු අවස්ථාවක සිදුවී නොමැති බවද වැටලීම කළ නිලධාරීන් සදහන් කරයි.

නාත්තන්ඩිය සහ අවට ස්ථාන රැසක මත් කුඩු සහිත කුඩා පැකට් තිබී පසුගිය දින කීපය තුළ පොලීසිය විසින් සොයා ගෙන ඇත.එම මත් කුඩු පැකට් ගෙනවිත් දමන්කේ කව්රුන්ද යන්න සම්බන්ධයෙන් කළ සොයා බැලීමකින් අනතුරුව සැකකරුව අත්අඩංගුවට ගැනීමට හැකිවී ඇත.

සැකකරුගේ පවුලේ බොහෝ දෙනෙකු ඉතාලියේ සේවය කරන නමුත් සැකකරු අධික ලෙස මත් කුඩු භාවිතවයට හුරුවී තිබීම නිසා ජාවාරමට සම්බන්ධව කටයුතු කරන බවත් වැටලීම කළ නිලධාරීන් සදහන් කරයි.

සැකකරුට මෙරටදී මත් කුඩු ගෙනවිත් දෙන්නේ කව්රුන්ද යන්න සම්බන්ධයෙන් පොලීසිය විමර්ශණයක් ආරම්භ කර ඇත.

මත් කුඩු සමග අත්අඩංගුවට ගෙන ඇති සැකකරුව අධිකරණයට ඉදිරිපත් කර රදවා ගෙන ප්‍රශ්ණ කිරීමට අවසර ලබා ගන්නා බවද වැටලීම කළ නිලධාරීන් සදහන් කළේය.

මාරවිල පොලීසියේ දුෂණ මර්ධන ඒකකයේ ස්ථානාධිපති පොලිස් පරීක්ෂක ධර්මප්‍රිය මහතා ඇතුළු නිලධාරීන් විසින් වැටලීම සිදු කර ඇත.

ජුඩ් සමන්ත