හදුන්වා දී ඇති Gov Pay “යෙදුම” තුළින් රථ වාහන වැරදි කරන දේශීය මෙන්ම විදේශීය රියදුරන්ටද ක්ෂණිකව දඩ මුදල් ගෙවීමට හැකියාව ලැබන බව රථවාහන පාලන සහ මාර්ග ආරක්ෂාව පිළිබද නියෝජ්‍ය පොලිස්පති ඩබ්ලිව්.පී. ජේ. සේනාධීර මහතා පැවසීය.

Gov Pay “යෙදුම” පුත්තලම දිස්ත්‍රික්කයේ රථ වාහන අංශ නිලධාරීන්ට සහ පොලිස් ස්ථානාධිපතිවරුන්ට හදුන්වා දීම වෙනුවෙන් හලාවතදී පැවති වැඩ සටහනකදී නියෝජ්‍ය පොලිස්පතිවරයා මේ බව කියා සිටියේය.

පුත්තලම දිස්ත්‍රික්කයේ පොලිස් ස්ථාන 23 ක්ස දහා Gov Pay “යෙදුම” භාවිතා කළ හැකි ජංගම දුරකතන බෙදා දීමද මෙහිදී සිදු විය.

මෙහිදී වැඩිදුරටත් අදහස් දැක්වූ නියෝජ්‍ය පොලිස්පති ඩබ්ලිව්.පී.ජේ.සේනාධීර මහතා මෙසේද පැවසීය.

පුත්තලම දිස්ත්‍රික්කය හරහා විශාල පිරිසක් දෛනිකව ගමන් කරන බව අපි දන්නවා.ඒ අතර වන්දනා සදහා මෙන්ම විවිධ සංචාරක කටයුතු සදහා පිටස්තර ප්‍රදේශ වලින් පැමිනෙන පිරිසද වනවා.එසේ පැමිනෙන ඇතැම් රියදුරන් විසින් සිදු කරන රථ වාහන වැරදි වලට දඩ පත්‍රිකා නිකුත් කිරීම පොලිස් නිලධාරීන් විසින් දෛනිකව සිදු කරනවා.දඩ පත්‍රිකා ලබන පිටස්තර ප්‍රදේශ වලින් පැමිනෙන රියදුරන් මෙවැනි අවස්ථා වලදී දැඩි දුෂ්කරතාවයකට පත් වන බව අපි දන්නවා.මොකද ඇතැම් විට දඩ පත්‍රිකාව නිකුත් කරන ස්ථානය සහ වේලාව අනුව එම මුදල ගෙවීමට රියදුරන්ට හැකි වන්නේ නෑ.ඒ නිසා බොහෝ රියදුරන්ට සිදුවනවා නැවත මෙම ප්‍රදේශයට පැමිණ දඩ මුදල් ගෙවා තමන්ගේ රියදුරු බලපත්‍රය ලබා ගැනීමට.

නමුත් හදුන්වා දෙන Gov Pay “යෙදුම” භාවිතා කරමින් රියදුරන්ට හැකි වනවා එම අවස්ථවේදීම මාර්ග ගත ක්‍රමයට අදාල දඩ මුදල ගෙවලා තමන්ගේ රියදුරු බලපත්‍රය ආපසු ලබා ගන්න.රථ වාහන රාජකාරියේ නිරත වන සියළුම පොලිස් නිලධාරීන්ට ඉදිරියේදී අපි Gov Pay “යෙදුම” සහිත දුරකතන ලබා දීමට කටයුතු කරනවා.යම් පොලිස් නිලධාරියෙකු සතුව Gov Pay “යෙදුම” සහිත දුරකතනයක් නොමැති නම් අදාල පොලිස් ස්ථානයට පැමිණ එම සේවාව ලබා ගැනීමටත් රියදුරන්ට හැකියාව ලැබෙනවා.

මෙහිදී අදහස් දැක්වූ ලංකා පේ (Lanka Pay ) ආයතනයේ මෙහෙයුම් ප්‍රධාන කළමණාකරු ලක්ෂමන් ලක්දාස් මහතා මෙසේ පැවසීය.

Gov Pay යෙදුම මේ වන විට මෙරට රාජ්‍ය ආයතන 205 ක සේවාවන් 3068 ක් සදහා යොදවා ගෙන තිබෙනවා. රාජ්‍ය ආයතන ඩිජිටල් කරණය කිරීමේ වැඩ සටහනේ පෙරගමන්කරු ලෙස Gov Pay යෙදුම හදුන්වා දෙන්න පුළුවන්.

රාජ්‍ය ආයතනයක කිසියම් ගෙවීමක්  සිදු කිරීමට සිදුවූ විට ජනතාව විශාල ලෙස රස්තියාදු වන බව අපි දන්නවා.මොකද සෑම රාජ්‍ය ආයතනයකම මුදල් බාර ගැනීමේ පහසුකම ක්‍රියාත්මන වන්නේ නෑ.ඒ නිසා ජනතාවට සිදු වනවා එම සේවාවන් සදහා වෙන් කර ඇති බැංකු වෙත හෝ වෙනත් ආයතන වෙත යන්න.නමුත් Gov Pay යෙදුම භාවිතා කිරීම තුළින් ක්ෂණිකව අදාල ස්ථානයේ සිටම ගෙවීම් කරන්න මහජනතාවට හැකියාව ලැබෙනවා.ඒ තුළින් විශාල මිනිස් පැය ප්‍රමාණයක් ඉතිරි වන බව අපි අමතක නොකළ යුතුයි.

පුත්තලම දිසාව බාර නියෝජ්‍ය පොලිස්පති දමයන්ත විජය ශ්‍රී,පුත්තලම කොට්ඨාස බාර ජේෂ්ඨ පොලිස් අධිකාරී මහේෂ් පෙරේරා,හලාවත කොට්ඨාස බාර ජේෂ්ඨ පොලිස් අධිකාරී රොහාන් පෙරේරා යන මහත්වරුන්ද මෙම අවස්ථාවට සහභාගි විය.

ජුඩ් සමන්ත