මා දැල් කර්මාන්තය සදහා යොදා ගන්නා “ට්‍රැක්ටරයට සවි කරන වින්ච් යන්ත්‍රය” නීතිගත කිරීමට හෝ ඒ සදහා විකල්පයක් හදුන්වා දීමට රජය කටයුතු නොකළහොත් ඉදිරියේදී එම කර්මාන්තය කඩා වැටීම පාලනය කළ නොහැකි බව සමස්ථ ලංකා මා දැල් කර්මාන්තකරුවන්ගේ සමුපාකාර සමියේ සාමාජිකයින් කියා සිටී.

ඉකුත් 14 වැනිදා හලාවත - මහවැවදී පැවති මාධ්‍ය හමුවකදී ඔවුන් මේ බව කියා සිටියේය.

මෙම මාධ්‍ය හමුවේදී අදහස් දැක්වූ සමස්ථ ලංකා මාදැල් කර්මාන්තකරුවන්ගේ සමුපාකාර සමිතියේ ලේකම් දිල්රුක් ප්‍රනාන්දු මහතා මෙසේ පැවසීය.

මේ වන විට අපේ රට තුළ මා දැල් 889 ක් ලියාපදිංචි කරලා තියනවා.මෙම මා දැල් ආශ්‍රිතව සෘජුව සහ වක්‍ර ලෙස පවුල් විශාල ප්‍රමාණයක් ජීවත් වෙනවා. අතීතයේදී මා දැලක් මුහුදේ ඉදලා ගොඩට ඇද්දේ මිනිස් ශ්‍රමය භාවිතා කරලා. ලෝකය දියුණු වෙන කොට අපිත් ඒ සමග ඉදිරියට යන විට මා දැල් ඇදීම සදහා “ට්‍රැක්ටරයට සවි කරන වින්ච් යන්ත්‍රය” මීට වසර 15 කට පමණ පෙර හදුන්වා දුන්නා.මෙම යන්ත්‍රය භාවිතා කිරීම තුළින් පහසුවෙන් මා දැලක් මුහුදේ සිට ගොඩ බිමට ඇද ගන්න පුළුවන්.මේ ආකාරයට යන්ත්‍ර යොදා ගෙන මා දැල් ඇදීම පෘතුගාලය, ඉන්දියාව වැනි රටවල් වලත් කරනවා.

“ට්‍රැක්ටරයට සවි කරන වින්ච් යන්ත්‍රය” නීතිගත කරන්න,එසේත් නැත්නම් ඒ වෙනුවට විකල්පයක් හදුන්වා දෙන්න කියලා අපි පසුගිය රජයවල් වලින් ඉල්ලීමක් කලා.ඒ පිළිබදව වන ඉල්ලීම් ලිපියක් වත්මන් ජනාධිපතිවරයාටත් බාර දී තිබෙනවා.එවන් වටපිටාවක් තුළ ධීවර දෙපාර්තමේන්තුවේ අධ්‍යක්ෂක ජනරාල්වරයා දිවයිනේ සියළුම සහකාර ධීවර අධ්‍යක්ෂකවරුන් වෙත ලිපියක් යොමු කරමින් දැණුම් දී ඇත්තේ “ට්‍රැක්ටරයට සවි කරන වින්ච් යන්ත්‍රය” මාදැල් කර්මාන්තයට යොදා ගැනීම දෙසැම්බර් 31 වැනිදා සිට තහනම් බවයි.

අපි කියන්නේ වින්ච් යන්ත්‍රය තහනම් කරන්න පෙර ඒ සදහා විකල්පයක් අපිට හදුන්වා දෙන්න කියන එකයි.එහෙම නැත්නම් වර්තමානයේ අපි පාවිච්චි කරන වින්ච් යන්ත්‍රයේ තියන අඩු පාඩු පෙන්වලා දීලා නවීකරණය කරන්න සහාය දෙන්න කියන එකයි.එසේ නොවුවොත් අපිට සිද්ධ වෙනවා මා දැල් කර්මාන්තයෙන් සම්පූර්ණයෙන්ම ඉවත් වෙන්න.එවිට මා දැල් කර්මාන්තකරුවන් මෙන්ම ඒ ආශ්‍රිතව සෘජුව සහ වක්‍රව ජීවත් වන විශාල පිරිසකට ජීවත් වීමේ ක්‍රමවේදයක් නැත්තටම නැති වෙනවා.

වත්මන් ජානාධිපතිවරයා කියා සිටිනවා ලෝකය දියුණු වෙන කොට අපිත් ඒ සමග වෙනස් විය යුතුයි කියලා.එහෙම නම් අපි අහන්නේ මා දැල් කර්මාන්තය වෙනස් වෙන්න ඕනේ නැද්ද කියන එකයි.අපි හැමදාම එකම ආකාරයට කර්මාන්තය කරගෙන යන්න ඕනද කියන එකත් අපි අහන්න කැමතියි.

සමස්ථ ලංකා මා දැල් කර්මාන්තකරුවන්ගේ සංගමයේ සභාපති ජෝෂප් ලෝව් මහතා අදහස් දක්වමින් මෙසේ පැවසීය.

මම අවුරුදු ගානක් මා දැල් කර්මාන්තයේ නිරත වෙනවා.මා දැල් නිසා අළුත් මාළු අඩු මිලකට පාරිභෝගිකයාට ලබා ගන්න අවස්ථාව තියනවා.නමුත් මේ ආකාරයට මා දැල් සදහා යොදා ගන්නා යන්ත්‍ර එකපාරටම තහනම් කරන්න ගියහොත් මොකද වෙන්නේ.මුහුද අයිති ධීවරයාට මිස අමාත්‍යාංශයට නෙමෙයි.අමාත්‍යාංශය කරන්න ඕනේ ධීවරයාට අළුත් ක්‍රමවේද හදුන්වා දෙමින් කර්මාන්තය වැඩි දියුණු කරන්න කටයුතු කරන එකයි.ඒ සදහා සහාය දෙන්න අපි ඕනම වෙලාවක සුදානම්.නමුත් මේ ආකාරයට එක පාරටම තීන්දු තීරණ ගෙන ක්‍රියාත්මක කරන්න යනවාට අපි විරුද්ධයි.

“ට්‍රැක්ටරයට සවි කරන වින්ච් යන්ත්‍රයේ” නිෂ්පාදකයා වන මීගමුවේ ජෝෂප් පීටර් ප්‍රනාන්දු මහතා මෙහිදී අදහස් දක්වමින් මෙසේ පැවසීය.

මේ යන්ත්‍රය හැදුවේ මමයි.යන්ත්‍රය හදපු වෙලාවේ නාරා ආයතනය ඇතුළු තවත් ආයතන ගනනාවක් ඇවිත් මේ සම්බන්ධයෙන් පර්යේෂණ කලා.ඔවුන් යන්ත්‍රයේ තියන අඩුපාඩු පෙන්වා දීමක් හෝ නවීකරණය කළ යුතු කිසිවක් ගැන කථා කළේ නැහැ.නමුත් දැන් එක පාරටම කියනවා “ට්‍රැක්ටරයට සවි කරන වින්ච් යන්ත්‍රය” භාවිතා කරලා මා දැල් ඇදීම තුළින් මුහුදේ ඉන්න මත්ස්‍ය සම්පත විනාශ වෙනවා.පරිසරයට හානි වෙනවා කියලා.අපි අහන්නේ අවුරුදු 15 ක් තිස්සේ මේ නොදැකපු විනාශයක් දැන් දකින්නේ කොහොමද කියන එකයි.

මුලතිව් හී මාදැල් ධීවර කාර්මිකයෙකු ලෙස කටයුතු කරන ධනුක පීරිස් මහතා මෙසේ පැවසීය.

“ට්‍රැක්ටරයට සවි කරන වින්ච් යන්ත්‍රය” මා දැල් කර්මාන්තය සදහා යොදා ගැනීම තුළින් මුහුද වෙරළට කිසිදු හානියක් වෙන්නේ නෑ.ඒක මවාගත්තු කථාවක් විතරයි.මුහුදු වෙරළ ඛාදනය වෙන්නේ අධික ලෙස ගංගා වලින් වැලි ගොඩ දැමීම නිසා.ඒ බව විශේෂඥයින් පවා පිළි අරගෙන තියනවා.පුල්මුඩේ මුහුදු වෙරළ තීරයෙන් දවසකට ඛණිජ වැලි කොපමණ ප්‍රමාණයක් ගන්නවාද? එවිට වෙරළට අවශ්‍ය වන වැලි තවත් තැනක් ඛාදනය කරමින් මුහුද ගන්නවා. ඒක ස්වාභාවිකව සිද්ධ වෙන දෙයක්.එහෙම නැතිව මා දැල් අදින්න යන්ත්‍රයක් යොදා ගත් විට මුහුදු වෙරළ ඛාදනය වෙනවා කියන එක පට්ට පල් බොරුවක් බව කියන්න කැමතියි.

කළුතර දිස්ත්‍රික්කයේ මාදැල් කර්මාන්තයේ නිරත වන නයනා ශිරෝමි මහත්සිය ඇතුළු තවත් කීප දෙනෙකුම මෙහිදී අදහස් දැක්වීය.

ජුඩ් සමන්ත