ඉකුත් 23 වැනිදා සවස හලාවත - කොළඹ මාර්ගයේ වෙන්නප්පුව - දුම්මලදෙණිය ප්‍රදේශයේදී මෙම අනතුර සිදුවී ඇත. අනතුරින් මිය ගොස් ඇත්තේ වෙන්නප්පුව - දුම්මලදෙණිය පදිංචිකරුවෙකු වන රතුගමගේ අශෝක් රවී ප්‍රනාන්දු (අවු:52) නම් අයෙකි.

අනතුරට පත්ව ඇති අය යතුරු පැදියක් තල්ලු කර පන ගන්වා ගෙන එයට ගොඩ වීමට උත්සාහ කර ඇත.එක් වරම පන ගැන්වී ඇති යතුරු පැදිය ඉදිරියට ධාවනය වී මාර්ගයේ ධාවනය වෙමින් තිබූ ලොරියක බද කොටසේ ගැටීමෙන් අනතුර සිදුවී ඇති බව පොලීසිය කියයි.

යතුරු පැදිකරු ලොරියේ පසුපස රෝදයට යටවීමෙන් එම ස්ථානයේදීම මිය ගොස් ඇත.අනතුරට සම්බන්ධ ලොරිය හලාවත සිට කොච්චිකඩේ ප්‍රදේශයේ උළු කර්මාන්ත ශාලාවකට දර ප්‍රවාහනය කරමින් තිබී ඇත.

ලොරියේ රියදුරුව පොලීසිය විසින් අත්අඩංගුවට ගෙන ඇත.

වෙන්නප්පුව පොලීසියේ රථ වාහන අංශය වැඩිදුර විමර්ශණ කරගෙන යයි.

ජුඩ් සමන්ත හලාවත